أحمد حلمي: عادل إمام قدوتي وعمل رقم قياسي محدش يقدر يكسره

كتبت/ مي السايح

كشف الفنان أحمد حلمي عن بداياته في المسرح، وعن إتخاذه الفنان عادل إمام قدوة له في أعماله الفنية، وذلك أثناء لقائه في برنامج Et بالعربي.

قال حلمي معلقًا: “أنا قدوتي في المسرح الزعيم عادل إمام، يعني ده بالنسبة لي يعني إيه مسرحية تقعد 5 سنين ومسرحية تانية تقعد 8 سنين و11 سنة، إزاي الجمهور مخلصش؟ المفروض يخلص، محدش هيقدر يكسر الرقم القياسي بتاع الزعيم”.

كما كشف حلمي عن الأغاني التي كانت تتصدر التريند في أفلامه، : “كل الأغاني بتبقى جوا الأعمال، وعمري ما عملت أغنية برا عمل درامي من أول ميدو مشاكل وعملت حوالي 5 أفلام ورا بعض فيهم أغاني، وبعد كده وقفت شوية لأني لقيت أن العمل مش محتاج وبعدين رجعنا تاني نعمل أغاني في الأفلام لأنها بتبقى حاجة لذيذة وبتبسط الجمهور”.

كما كشف الفنان حلمي لتحضيراته لمسرحية “ميمو”، وعودته للمسرح وذلك بعد غياب ٢٣ عاماً وعلق قائلاً : المستشار تركي آل الشيخ، قالي المسرحية 10 أيام، أنا أعرف أن المسرحية 5 أيام مثلًا لكن 10 إزاي، وقالي اسمع الكلام وهنعرض في المسرح الكبير”.

وأضاف قائلاً : “وأنا أترعبت وكنت خايف من مواجهة الجمهور وجه لوجه، أو أن الجمهور ميجيش أو يجي أول يوم وميجيش تاني يوم، وبعد العرض قالي شوفت قولتلك، وطلعنا عملنا جولة السعودية وعرضنا حوالي 30 يوم في السعودية، وطلبت منه أعرض في مصر، وطبعًا رحب جدًا وبيطمن كل شوية أخبار الجمهور إيه”.