كتبت/ إيمان أشرف
أعلنت الفنانة أمينة خليل أنها قررت عدم المشاركة في الماراثون الرمضاني المقبل 2026، قائلة: “مش هشتغل في السباق الرمضاني للدراما علشان أتفرغ أكتر للسينما، خصوصًا إن عندي ثلاثة أفلام شغالة فيهم حاليًا.”
كشفت أمينة عن مدى تأثرها بمسلسل «لام شمسية» الذي عُرض في رمضان الماضي، والأثر الذي تركه عليها، قائلة:”المسلسل أثر في جدًا، ولأول مرة أحس بكمية التأثير اللي عملها في دور، وهو أكتر دور صعب عملته في حياتي كلها.”
تابعت: “فاكرة آخر يوم تصوير، بعد ما خلصنا ورجعت البيت، حصل لي إحساس غريب جدًا، بصيت في المرايا، وللحظة مكنتش عارفة أمينة راحت فين، فضلت شهر بحاول أرجع لنفسي، وأفكرني بالحاجات اللي بحبها”.
أضافت أمينة: “بدأت أعمل ديتوكس جسدي وعاطفي وكل حاجة، وأقعد وقت طويل مع أهلي علشان أحس بالأمان وسطهم، كنت محتاجة أفرغ كل طاقة المسلسل اللي شلتها، لأنها كانت طاقة شخصية نيللي مش طاقتي أنا”، واختتمت مازحة: “كان لازم أخرج بسرعة علشان أتجوز”.
